Raúl era un neno moi bó. Todos o queren. Os pais e os avós pensan que é o mellor neno do mundo. Pero non se decatan de que Raúl ten un grave problema. Raúl non sabe dicir que non. Non sabe este neno, nacido en Compostela, dicir: "non" no momento adecuado, e pode poñer a calquera en serios apuros.

Este libro está cheo de música. Ábreo. Achégao ao oído. Escoita… ¿Que oes? O vento. Na voz do vento todos os seres do mundo contan algún anaco da súa vida. Os animais, as plantas, a lúa, o sol… Todos a falar dalgún segredo que antes non coñeciamos. A voz do vento para as páxinas deste libro e éncheas de poesía.

A montaña é o lugar no que vive Belidadona. E a montaña e tódolos seus habitantes viven neste libro de poemas que recolle a música do vento, as cancións dos paxaros, os contos que se contan os ananos e as fadas do bosque, e os bailes que trazan as corzas noviñas sobre a neve recén caída. -

Premio Barco de Vapor 1986. A novela comeza un 21 de xuño, o día en que remata o curso e se abre para Dores, a protagonista, o tempo cheo de ilusións das vacacións do verán. A victoria nunha divertida e orixinal competición "deportiva" -unha carreira de caracois- vaille dar a oportunidade de emprender unha viaxe a Illa Redonda, un lugar fermoso e máxico onde as fantasías poden converterse en sorpresivas realidades.

Este é un conxunto de relatos de temática moi variada nos que están presentes os trazos que caracterizan a escrita de Helena Villar. A ollada que a autora guinda sobre unha realidade sempre complexa abre as portas dun mundo enxergado a través do lirismo e atravesado por un fondo sentimento de solidariedade humana. O humor, a tenrura e o medo cobran vida e intensidade na prosa desta escritora.